ബീഹാറിന് ശേഷം ഡൽഹിയിൽ സ്പെഷ്യൽ ഇൻ്റൻസീവ് റിവിഷൻ (SIR) വോട്ടർ പട്ടിക പുതുക്കൽ പ്രക്രിയക്ക് തിരഞ്ഞെടുപ്പ് കമ്മീഷൻ (ECI) ഒരുക്കം തുടങ്ങി. വോട്ടർ പട്ടിക കൃത്യവും പൂർണ്ണവുമാണെന്ന് ഉറപ്പാക്കുക എന്ന ഭരണഘടനാപരമായ കടമയുടെ ഭാഗമാണിത്. എസ്ഐആർ ഡ്രൈവിന്റെ കൃത്യമായ തീയതി പിന്നീട് പ്രഖ്യാപിക്കും.
2002-ലെ വോട്ടർ പട്ടികയിൽ പേര് വരാത്ത ആരെങ്കിലും ഉണ്ടെങ്കിൽ, എൻയുമാറേഷൻ ഫോം സമർപ്പിക്കുമ്പോൾ തിരിച്ചറിയൽ രേഖയും നൽകണമെന്ന് ഡൽഹി ചീഫ് ഇലക്ടറൽ ഓഫീസർ (CEO) അറിയിച്ചു.”വോട്ടർ പട്ടികയുടെ വിശ്വാസ്യത സംരക്ഷിക്കുക എന്ന തങ്ങളുടെ ഭരണഘടനാപരമായ ഉത്തരവാദിത്തം നിറവേറ്റുന്നതിനായി രാജ്യത്തുടനീളം സ്പെഷ്യൽ ഇൻ്റൻസീവ് റിവിഷൻ (SIR) ആരംഭിക്കാൻ കമ്മീഷൻ തീരുമാനിച്ചതായി പൊതുജനങ്ങളെ അറിയിക്കുന്നു.” പ്രസ്താവനയിൽ പറഞ്ഞു. ഈ വലിയ പ്രക്രിയയുടെ ഭാഗമായി ദേശീയ തലസ്ഥാനത്തും പ്രത്യേക വോട്ടർ പട്ടിക പുതുക്കൽ ഡ്രൈവ് ഉടൻ ആരംഭിക്കുമെന്നും പ്രസ്താവനയിൽ കൂട്ടിച്ചേർത്തു.
വെസ്റ്റ് ബംഗാളിലെ എസ്ഐആർ സമയരേഖയെക്കുറിച്ച് സംസാരിച്ചുകൊണ്ട് കഴിഞ്ഞ മാസം മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ, രാജ്യത്തുടനീളം ഈ പ്രക്രിയ നടത്തുന്നതിനുള്ള ഉചിതമായ തീയതി ഉടൻ പ്രഖ്യാപിക്കുമെന്ന് പറഞ്ഞിരുന്നു.
സമൂഹമാധ്യമങ്ങളിലെ ഒരു പോസ്റ്റിൽ ഡൽഹി സിഇഒ 2002-ലെ വോട്ടർ പട്ടിക ഓൺലൈനായി അപ്ലോഡ് ചെയ്യുകയും, വോട്ടർമാർക്ക് അവരുടെ (അല്ലെങ്കിൽ അവരുടെ മാതാപിതാക്കളുടെ) പേരുകൾ ആ പഴയ പട്ടികയിൽ ഉണ്ടോയെന്ന് പരിശോധിക്കാൻ സഹായിക്കുന്നതിനായി നിലവിലെ അസംബ്ലി നിയോജക മണ്ഡലങ്ങളെ 2002-ലേതുമായി ബന്ധിപ്പിക്കുകയും ചെയ്തു.
“ബന്ധപ്പെട്ട എല്ലാ ഉദ്യോഗസ്ഥർക്കും – ജില്ലാ തിരഞ്ഞെടുപ്പ് ഓഫീസർമാർക്കും, ഇലക്ടറൽ രജിസ്ട്രേഷൻ ഓഫീസർമാർക്കും, അസിസ്റ്റന്റ് ഇലക്ടറൽ രജിസ്ട്രേഷൻ ഓഫീസർമാർക്കും, ബൂത്ത് ലെവൽ ഓഫീസർമാർക്കും (BLO) പരിശീലനം നൽകിയിട്ടുണ്ട്,” സിഇഒയുടെ ഓഫീസ് പുറത്തിറക്കിയ ഔദ്യോഗിക പ്രസ്താവനയിൽ പറയുന്നു.
എസ്ഐആറിൻ്റെ ഭാഗമായി വീടുകൾ കയറിയുള്ള സന്ദർശനത്തിനായി (H2H) എല്ലാ അസംബ്ലി നിയോജക മണ്ഡലങ്ങളിലും ബിഎൽഒമാരെ നിയമിച്ചിട്ടുണ്ട്. വോട്ടർമാരോട് അവരുടെയും മാതാപിതാക്കളുടെയും പേരുകൾ 2002-ലെ പട്ടികയിൽ ഉണ്ടോയെന്ന് പരിശോധിക്കാൻ ആവശ്യപ്പെടുന്നുണ്ട്.
പ്രസ്താവന പ്രകാരം, “2002-ലെയും 2025-ലെയും വോട്ടർ പട്ടികയിൽ പേരുകളുള്ളവർ എൻയുമാറേഷൻ ഫോമുകൾക്കൊപ്പം 2002-ലെ വോട്ടർ പട്ടികയുടെ പകർപ്പ് കൂടി സമർപ്പിക്കണം”. ഒരു വോട്ടറുടെ പേര് 2002-ലെ പട്ടികയിൽ ഇല്ലെങ്കിൽ, പക്ഷേ അവരുടെ മാതാപിതാക്കളുടെ പേരുണ്ടെങ്കിൽ, വോട്ടർ എൻയുമാറേഷൻ ഫോമിനും 2002-ലെ പട്ടികയിൽ അവരുടെ മാതാപിതാക്കളുടെ പേരുള്ള പകർപ്പിനും പുറമെ തിരിച്ചറിയൽ രേഖയും നൽകണം.
