എമ്പുരാൻ സിനിമയ്ക്കെതിരായ വിമർശനങ്ങൾ തൊടാതെ ബിജെപി സംസ്ഥാന നേതൃത്വം. സിനിമയ്ക്കെതിരെ സോഷ്യൽ മീഡിയയിൽ വരുന്ന അഭിപ്രായ പ്രകടനങ്ങൾ വ്യക്തിപരമാണെന്നും സംഘടനയുടേതല്ലെന്നും സിനിമയ്ക്കെതിരെ ബിജെപി കാംപെയ്ന്‍ തുടങ്ങിയിട്ടില്ലെന്നും ഒരു സിനിമയും പാര്‍ട്ടിയെ ബാധിക്കില്ലെന്നും ബിജെപി സംസ്ഥാന ജനറല്‍ സെക്രട്ടറി അഡ്വ. പി. സുധീര്‍ പറഞ്ഞു.
ബിജെപി സംസ്ഥാന കോര്‍ കമ്മിറ്റി യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. സെക്രട്ടറി അഡ്വ. എസ്. സുരേഷിനൊപ്പമാണ് അഡ്വ. പി. സുധീര്‍ മാധ്യമങ്ങളെ കണ്ടത്.
സിനിമ എന്താണെന്ന് അത് കാണുന്ന ആസ്വാദകരാണ് വിലയിരുത്തേണ്ടത്. സിനിമ ഞങ്ങളെ ബാധിക്കുന്ന വിഷയമേയല്ല. സിനിമ സിനിമയുടെ വഴിക്കും പാർട്ടി പാർട്ടിയുടെ വഴിക്കും പോകുമെന്നും സോഷ്യല്‍ മീഡിയയില്‍ വരുന്നത് വ്യക്തിപരമായ അഭിപ്രായമാണെന്നും അദ്ദേഹം പറഞ്ഞു.
