പുണ്യമാസമായ റമദാന്‍ അടുത്തിരിക്കെ, യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം ഒരു ബില്യണ്‍ ദിര്‍ഹത്തിന്റെ (22,57,69,45,430 രൂപ) ‘മദേഴ്സ് എന്‍ഡോവ്മെന്റ്’ എന്ന ജീവകാരുണ്യ പദ്ധതി പ്രഖ്യാപിച്ചു.
അമ്മമാരുടെ ക്ഷേമമാണ് ഈ സംരംഭത്തിലൂടെ പ്രധാനമായും ലക്ഷ്യമിടുന്നത്. യുഎഇയിലെ വിദ്യാഭ്യാസ ആവശ്യങ്ങള്‍ക്കായി ഫണ്ട് സ്വരൂപിക്കുക എന്നതും ലക്ഷ്യമാണ്. അധഃസ്ഥിത വിഭാഗങ്ങളിലെ വിദ്യാഭ്യാസത്തെയും തൊഴിലധിഷ്ഠിത സംവിധാനങ്ങളെയും പിന്തുണയ്ക്കുകയും അതുവഴി അവരുടെ ജീവിത നിലവാരവും തൊഴിലവസരങ്ങളും സാമൂഹിക ഉന്നമനവും വര്‍ധിപ്പിക്കുകയും ചെയ്യും.
എക്‌സ് പ്ലാറ്റ്‌ഫോമില്‍ പങ്കിട്ട വീഡിയോയിലൂടെ ഈ സംരംഭത്തില്‍ പങ്കെടുക്കാന്‍ ഷെയ്ഖ് മുഹമ്മദ് പൊതുജനങ്ങളോട് അഭ്യര്‍ഥിച്ചു. ‘സഹോദരീ സഹോദരന്‍മാരെ… അനുഗ്രഹീതമായ ഒരു മാസം നമ്മെ തേടിയെത്തുകയാണ്. എമിറേറ്റ്സിലെ ജനങ്ങള്‍ക്കായി റമദാന്‍ കാമ്പെയ്ന്‍ ആരംഭിക്കുന്ന നമ്മുടെ വാര്‍ഷിക ശീലത്തിന് അനുസൃതമായി, ഇത്തവണ ‘മാതൃ എന്‍ഡോവ്മെന്റ്’ ആരംഭിക്കുകയാണ്.
എമിറേറ്റ്സിലെ അമ്മമാര്‍ക്ക് വേണ്ടിയുള്ള ചാരിറ്റിയായി ഒരു ബില്യണ്‍ ദിര്‍ഹം മൂല്യമുള്ള വിദ്യാഭ്യാസ എന്‍ഡോവ്മെന്റ് ആരംഭിക്കുന്നു’- ഷെയ്ഖ് മുഹമ്മദ് എക്സില്‍ കുറിച്ചു.’അമ്മ സ്വര്‍ഗമാണ്…അമ്മ പറുദീസയിലേക്കുള്ള പാതയാണ്… ഈ ദാനത്തില്‍ എല്ലാവരോടും പങ്കാളികളാകാന്‍ ഞങ്ങള്‍ ആഹ്വാനം ചെയ്യുന്നു… യുവാക്കളും പ്രായമായവരും… പുരുഷന്‍മാരും സ്ത്രീകളും.. നമുക്ക് നമ്മുടെ അമ്മമാരെ സന്തോഷിപ്പിക്കാം…ദൈവത്തെ പ്രീതിപ്പെടുത്താം. വ്രതമാസത്തില്‍ നമ്മള്‍ നന്മയിലും സ്‌നേഹത്തിലും കരുണയിലും ആയിരിക്കുമ്പോള്‍… ദൈവം യുഎഇയെയും എമിറേറ്റ്സിലെ ജനങ്ങളുടെ അമ്മമാരെയും സംരക്ഷിക്കട്ടെ’- അദ്ദേഹം കൂട്ടിച്ചേര്‍ത്തു.
