ഫിലിപ്പൈൻസിൽ നടന്ന 46-ാമത് മിസിസ് യൂണിവേഴ്സ് മത്സരത്തിൽ ഇന്ത്യയുടെ കൽപ്പന ശുക്ല ഫസ്റ്റ് റണ്ണർ അപ്പ് പട്ടം നേടി. ഈ ബഹുമതി ലഭിക്കുന്ന ആദ്യ ഇന്ത്യൻ വനിതയാണ് കൽപന. മത്സരത്തിലെ കൽപനയുടെ അവിശ്വസനീയമായ യാത്ര ചരിത്ര നേട്ടത്തിനാണ് വഴിയൊരുക്കിയത്. 46 വർഷത്തെ നീണ്ട കാത്തിരിപ്പിനൊടുവിലാണ് ഇന്ത്യയ്ക്ക് മിസിസ് യൂണിവേഴ്‌സിൽ പട്ടം കരസ്ഥമാക്കാൻ സാധിച്ചത്. മത്സരത്തിൽ മികച്ച ദേശീയ വസ്ത്രാലങ്കാരത്തിനുള്ള പുരസ്കാരവും ഇന്ത്യ കരസ്ഥമാക്കി. ഫിലിപ്പൈൻസിന്റെ തലസ്ഥാനമായ മനിലയിൽ സംഘടിപ്പിച്ച മത്സരത്തിൽ വിവിധ രാജ്യങ്ങളിൽ നിന്നുള്ള നൂറിലധികം പ്രതിനിധികൾ പങ്കെടുത്തു.
കൽപ്പനയുടെ നേട്ടത്തിനുപിന്നിൽ സംവിധായിക ഊർമിമല ബറുവയുടെ പ്രചോദനം എടുത്തുപറയേണ്ടതാണ്. ദേശീയ വേഷവിധാനത്തിന്റെ സെഷനിൽ കൽപ്പനയ്ക്കായി ഊർമിമല തയ്യാറാക്കിയ വസ്ത്രത്തിലൂടെ ഇന്ത്യയുടെ സമ്പന്നമായ സാംസ്കാരിക പൈതൃകം പ്രദർശിപ്പിക്കാൻ ഇരുവർക്കും സാധിച്ചു. ഇതിനെ എല്ലാവരും അഭിനന്ദിക്കുകയും ദേശീയ വസ്ത്രാലങ്കാരത്തിനുള്ള പുരസ്കാരം നേടിയെടുക്കാൻ സഹായിക്കുകയും ചെയ്തു.
കൽപനയുടെയും സംഘത്തിന്റെയും ശ്രദ്ധേയമായ ഈ നേട്ടം അവരുടെ കഠിനാധ്വാനത്തിന്റെയും കഴിവിന്റെയും തെളിവ് മാത്രമല്ല, സ്ത്രീ ശാക്തീകരണത്തിന്റെ ഉജ്ജ്വലമായ ഉദാഹരണം കൂടിയാണ്. പ്രതിബന്ധങ്ങളെ തരണം ചെയ്യാനും അവരുടെ സ്വപ്നങ്ങൾ സാക്ഷാത്കരിക്കാനും മറ്റുള്ളവരെ പ്രചോദിപ്പിക്കുന്ന യാത്രയുടെ അംഗീകാരമാണ് ഈ നേട്ടം.
