അരുണാചൽ പ്രദേശിലെ അഞ്ജാവ് ജില്ലയിൽ, ഇന്ത്യ-ചൈന അതിർത്തിക്ക് സമീപം 120 അടി നീളമുള്ള പാലം ഇന്ത്യൻ സൈന്യം ഉദ്ഘാടനം ചെയ്തു. ബോർഡർ റോഡ്‌സ് ഓർഗനൈസേഷന്റെ (BRO) ഏകോപനത്തോടെയാണ് പാലത്തിന്റെ നിർമാണം സൈന്യം പൂർത്തിയാക്കിയത്. പ്രാദേശിക മിഷ്മി സമുദായാംഗങ്ങളും ഉദ്ഘാടന ചടങ്ങിൽ സന്നിഹിതരായിരുന്നു.
അതിർത്തിയോട് ചേർന്നുള്ള വിദൂര പ്രദേശങ്ങളിലൊന്നാണ് അഞ്ജാവിലെ ചഗ്ലോഹാഗം സർക്കിൾ.
ഹയുലിയാങ്ങിൽ നിന്ന് 57 കിലോമീറ്റർ ദൂരമുള്ള ഒരൊറ്റ ധമനി പാതയിലൂടെയാണ് ചഗ്ലോഹാഗമിലേക്ക് പോകാൻ കഴിയുക.
മഴ കാലത്ത് കരകവിഞ്ഞൊഴുകാൻ സാധ്യതയുള്ള നാലായിലെ പാലം നിർമാണത്തിന് ഇപ്പോഴാണ് ആവശ്യമായ അനുമതി ലഭിച്ചത്. മുൻപ് നിരവധി പ്രദേശവാസികളുടെ ജീവൻ അപഹരിച്ചിട്ടുണ്ട് ഈ സ്ഥലം. ഹയുലിയാങ്ങിനും ചഗ്ലോഹാഗത്തിനും ഇടയിൽ റോഡ് ബന്ധിപ്പിക്കുന്ന പാലം നിർമിച്ച് നൽകിയതിന് ഗ്രാമത്തിലെ മുതിർന്നവർ ഇന്ത്യൻ സൈന്യത്തിനും ബിആർഒയ്ക്കും നന്ദി പറഞ്ഞു.
അതേസമയം ഇന്ത്യൻ ആർമി ഉദ്യോഗസ്ഥരും മുതിർന്ന ബിആർഒ ഓഫീസർമാരും സിവിൽ പ്രമുഖരും ഗ്രാമവാസികളെ അഭിസംബോധന ചെയ്യുകയും അവർക്ക് പൂർണ്ണ പിന്തുണ ഉറപ്പ് നൽകുകയും ചെയ്തു.
