തിരുവനന്തപുരം: സംസ്ഥാനത്ത് ആദ്യമായി ദിനം പ്രതിയുള്ള കൊവിഡ് കണക്ക് പതിനായിരം കടന്നു. ആശങ്ക ശക്തമായി തുടരുന്നതിനിടെ കേരളത്തില്‍ ഇന്ന് 10606 പേര്‍ക്ക് കൊവിഡ്-19 സ്ഥിരീകരിച്ചു. ആരോഗ്യവകുപ്പ് പുറത്തുവിട്ട കണക്കുകളിലാണ് സംസ്ഥാനത്തെ സ്ഥിതിഗതികള്‍ വ്യക്തമാക്കുന്നത്. കേരളത്തില്‍ ഗുരുതരമായ സാഹചര്യമാണുള്ളത്.
906 പേരാണ് സംസ്ഥാനത്ത് കൊവിഡ് ബാധിച്ച്‌ ഇതുവരെ മരിച്ചത്. നാല് ജില്ലകളില്‍ ആയിരത്തിന് മുകളില്‍ കൊവിഡ് കേസുകള്‍ സ്ഥിരീകരിച്ചു. 9542 പേര്‍ക്ക് സമ്ബര്‍ക്കത്തിലൂടെയാണ് രോഗം ബാധിച്ചത്. 741 പേരുടെ സമ്ബര്‍ക്ക ഉറവിടം വ്യക്തമല്ല. രോഗബാധിതരുടെ എണ്ണം വര്‍ദ്ധിച്ചതോടെ വീടുകളിലും ആശുപത്രികളിലുമായി ചികിത്സയിലും നിരീക്ഷണത്തിലും കഴിയുന്നവരുടെ എണ്ണം വര്‍ധിച്ചു.720 ഹോട്ട് സ്പോട്ടുകളാണ് സംസ്ഥാനത്തുള്ളത്.
ആയിരം കടന്ന് കോഴിക്കോട്, മലപ്പുറം, എറണാകുളം, തിരുവനന്തപുരം ജില്ലകള്‍
കൂടുതല്‍ കേസുകള്‍ കോഴിക്കോട് ജില്ലയിലാണ്. കോഴിക്കോട് 1576, മലപ്പുറം 1350, എറണാകുളം 1201, തിരുവനന്തപുരം 1182, തൃശൂര്‍ 948, കൊല്ലം 852, ആലപ്പുഴ 672, പാലക്കാട് 650, കണ്ണൂര്‍ 602, കോട്ടയം 490, കാസര്‍ഗോഡ് 432, പത്തനംതിട്ട 393, വയനാട് 138, ഇടുക്കി 120 എന്നിങ്ങനേയാണ് ജില്ലകളില്‍ ഇന്ന് രോഗ ബാധ സ്ഥിരീകരിച്ചത്.
ദിനം പ്രതിയുള്ള രോഗബാധിതരുടെ എണ്ണം ഉയര്‍ന്ന തോതില്‍ തുടരുന്നതും മരണസംഖ്യ ഉയരുന്നതുമാണ് തിരിച്ചടിയാകുന്നത്. സമ്ബര്‍ക്കത്തിലൂടെയുള്ള കൊവിഡ് കേസുകളും ഉയര്‍ന്ന തോതിലാണ്. ആരോഗ്യ പ്രവര്‍ത്തകരില്‍ കൊവിഡ് സ്ഥിരീകരിക്കുന്നത് പ്രതിരോധ പ്രവര്‍ത്തനങ്ങള്‍ക്ക് തിരിച്ചടിയാകും. രോഗികളുടെ എണ്ണം വര്‍ദ്ധിച്ചതോടെ വീടുകളിലും ആശുപത്രികളിലുമായി ചികിത്സയിലും നിരീക്ഷണത്തിലും കഴിയുന്നവരുടെ എണ്ണം വര്‍ദ്ധിച്ചു. ഹോട്ട് സ്പോട്ടുകളുടെ എണ്ണത്തിലും വര്‍ദ്ധനയുണ്ട്.
ദിനം പ്രതിയുള്ള കൊവിഡ് കണക്കുകളില്‍ തിരുവനന്തപുരം ആശങ്കയുണ്ടാക്കുന്നുണ്ട്. ജില്ലയില്‍ രോഗമുക്തി നേടുന്നവരുടെ എണ്ണം ഉയര്‍ന്ന തോതിലാണെങ്കിലും ദിനം പ്രതി കൊവിഡ് സ്ഥിരീകരിക്കുന്നവരുടെ എണ്ണത്തില്‍ മുന്നിലാണ്. സമ്ബര്‍ക്കത്തിലൂടെയുള്ള കേസുകളും ഉറവിടമറിയാത്ത കൊവിഡ് കേസുകളുമാണ് ജില്ലയില്‍ ഉയര്‍ന്ന തോതില്‍. എറണാകുളം, മലപ്പുറം ജില്ലകളിലും കൊവിഡ് കേസുകള്‍ ഉയര്‍ന്ന തോതിലാണ്.
