ഐപിഎൽ മത്സരങ്ങൾക്കിടയിൽ താരങ്ങളും ടീം ഉടമകളും സുരക്ഷാ മാനദണ്ഡങ്ങൾ ലംഘിക്കുന്നതിൽ ആശങ്ക പ്രകടിപ്പിച്ച് ബിസിസിഐ. വ്യാഴാഴ്ച പുറത്തിറക്കിയ എട്ട് പേജുള്ള മാർഗ്ഗനിർദ്ദേശത്തിൽ താരങ്ങൾക്കും ഫ്രാഞ്ചൈസികൾക്കും കർശനമായ നിയന്ത്രണങ്ങളാണ് ബിസിസിഐ സെക്രട്ടറി ദേവാജിത് സൈക നിർദ്ദേശിച്ചിരിക്കുന്നത്. പ്രൊഫഷണലിസം, അച്ചടക്കം, സുരക്ഷാ ബോധം എന്നിവ ഉറപ്പുവരുത്താനാണ് ഈ നീക്കം.
ഈ സീസണിൽ റിപ്പോർട്ട് ചെയ്യപ്പെട്ട അച്ചടക്ക ലംഘനങ്ങളും പ്രോട്ടോക്കോൾ വീഴ്ചകളും ടൂർണമെന്റിനും ബിസിസിഐയ്ക്കും അവമതിപ്പുണ്ടാക്കാൻ സാധ്യതയുണ്ടെന്ന് ബോർഡ് മുന്നറിയിപ്പ് നൽകി. താരങ്ങളുടെ ഹോട്ടൽ മുറികളിൽ അനുമതിയില്ലാതെ സന്ദർശകർ എത്തുന്നതും സുരക്ഷാ ഉദ്യോഗസ്ഥരെ (SLO) അറിയിക്കാതെ താരങ്ങൾ പുറത്തുപോകുന്നതും വലിയ സുരക്ഷാ ഭീഷണിയാണെന്ന് ബിസിസിഐ ചൂണ്ടിക്കാട്ടി.
താരങ്ങൾക്കും സ്റ്റാഫിനും ഉടമകൾക്കുമുള്ള പ്രധാന നിർദ്ദേശങ്ങൾ
1. ഹോട്ടൽ മുറിയിലെ സന്ദർശകർ: ടീം മാനേജരുടെ രേഖാമൂലമുള്ള അനുമതിയില്ലാതെ ആരെയും ഹോട്ടൽ മുറിയിലേക്ക് പ്രവേശിപ്പിക്കരുത്. സന്ദർശകരെ ഹോട്ടൽ ലോബിയിലോ റിസപ്ഷനിലോ മാത്രമേ സ്വീകരിക്കാവൂ. ഹണി ട്രാപ്പിംഗിനും ലൈംഗികാരോപണങ്ങൾക്കും സാധ്യതയുള്ളതിനാൽ ഫ്രാഞ്ചൈസികൾ അതീവ ജാഗ്രത പുലർത്തണം.
2. യാത്രകൾ: ഹോട്ടലിൽ നിന്ന് പുറത്തുപോകുമ്പോൾ സെക്യൂരിറ്റി ലെയ്സൺ ഓഫീസർ (SLO), ടീം ഇന്റഗ്രിറ്റി ഓഫീസർ (TIO) എന്നിവരിൽ നിന്ന് മുൻകൂട്ടി അനുമതി വാങ്ങണം. എല്ലാ യാത്രകളുടെയും ലോഗ് ബുക്ക് സൂക്ഷിക്കണം.
3. ടീം ഉടമകൾക്കുള്ള നിയന്ത്രണം: മത്സരത്തിനിടെ ഡഗൗട്ടിലോ ഡ്രസ്സിംഗ് റൂമിലോ താരങ്ങളുമായി നേരിട്ട് സംസാരിക്കാനോ അവരെ കെട്ടിപ്പിടിക്കാനോ ഫിസിക്കൽ കോൺടാക്റ്റ് നടത്താനോ ഉടമകൾക്ക് അനുവാദമില്ല. ഇത് ടീമിന്റെ പ്രവർത്തനങ്ങളെ ബാധിക്കുമെന്നാണ് ബിസിസിഐ നിലപാട്.
വേപ്പിംഗിന് (Vaping) കർശന നിരോധനം
രാജസ്ഥാൻ റോയൽസ് താരം റിയാൻ പരാഗ് ഡ്രസ്സിംഗ് റൂമിൽ വേപ്പിംഗ് നടത്തുന്നത് ക്യാമറയിൽ പതിഞ്ഞതും യുസ്വേന്ദ്ര ചഹൽ ഇ-സിഗരറ്റ് ഉപയോഗിക്കുന്നതായി സൂചന നൽകുന്ന വീഡിയോകളും വലിയ വിവാദമായിരുന്നു.
ഇന്ത്യയിൽ ഇ-സിഗരറ്റുകൾ നിരോധിച്ചിട്ടുള്ളതാണെന്നും ഇത് കൈവശം വയ്ക്കുന്നത് നിയമവിരുദ്ധമാണെന്നും ബിസിസിഐ ഓർമ്മിപ്പിച്ചു. സ്റ്റേഡിയം പരിസരം, ഡ്രസ്സിംഗ് റൂം, ഹോട്ടലുകൾ, പരിശീലന കേന്ദ്രങ്ങൾ എന്നിവിടങ്ങളിൽ വേപ്പിംഗ് പൂർണ്ണമായും നിരോധിച്ചു.
കർശന നടപടികൾ
പുതിയ നിയമങ്ങൾ ലംഘിക്കുന്നവർക്കെതിരെ കടുത്ത നടപടികളുണ്ടാകുമെന്ന് ബിസിസിഐ വ്യക്തമാക്കി.
* ഫ്രാഞ്ചൈസികൾക്കോ വ്യക്തികൾക്കോ കാരണം കാണിക്കൽ നോട്ടീസ് നൽകും.
* വലിയ തുക പിഴയായി ഈടാക്കും.
* താരങ്ങളെ സീസണിൽ നിന്ന് സസ്പെൻഡ് ചെയ്യാനോ അയോഗ്യരാക്കാനോ സാധ്യതയുണ്ട്.
* നിയമവിരുദ്ധമായ കാര്യങ്ങൾ ചെയ്താൽ പോലീസിനെ അറിയിക്കും.
