നമ്മുടെ നിത്യജീവിതത്തിലെ ഭക്ഷണക്രമത്തിൽ ഒഴിവാക്കാനാവാത്ത ഒന്നാണ് മുട്ട. പ്രഭാതഭക്ഷണമായാലും ഉച്ചഭക്ഷണമായാലും മുട്ട വിഭവങ്ങൾ നമുക്കേറെ പ്രിയപ്പെട്ടതാണ്. മുട്ടകൾ അവശ്യ പോഷകങ്ങളുടെ മികച്ച ഉറവിടമാണ്. മുട്ട ഒരു പൂർണ പ്രോട്ടീൻ ഉറവിടമാണ്, കൂടാതെ ഇതിൽ ഒമ്പത് അവശ്യ അമിനോ ആസിഡുകളും അടങ്ങിയിരിക്കുന്നു. ശരാശരി വലിപ്പമുള്ള ഒരു മുട്ടയിൽ ഏകദേശം 6-7 ഗ്രാം ഉയർന്ന നിലവാരമുള്ള പ്രോട്ടീൻ അടങ്ങിയിട്ടുണ്ട്.
പ്രോട്ടീനിനൊപ്പം വൈറ്റമിൻ എ, ബി12, ഡി, കോളിൻ, ആന്റിഓക്സിഡന്റുകൾ എന്നിവയും മുട്ടയിലുണ്ട്. ഹൃദയാരോഗ്യം, തലച്ചോറിന്റെ പ്രവർത്തനം, കണ്ണിന്റെ ആരോഗ്യം എന്നിവയ്ക്കായി മിക്ക ആളുകൾക്കും ദിവസവും ഒരു മുട്ട വീതം കഴിക്കാൻ നിർദേശിക്കാറുണ്ട്. എന്നാൽ ദിവസവും മുട്ട കഴിക്കുന്നത് ശരീരത്തിന് നല്ലതാണോ എന്ന കാര്യത്തിൽ പലരിലും സംശയങ്ങളുണ്ട്. ദിവസവും മുട്ട കഴിക്കുമ്പോൾ നിങ്ങളുടെ ശരീരത്തിൽ എന്ത് സംഭവിക്കുന്നുമെന്ന് നോക്കാം.
1. പ്രോട്ടീനും പേശികളുടെ ആരോഗ്യവും
ഒരു വലിയ മുട്ടയിൽ ഏകദേശം 6-7 ഗ്രാം ഉയർന്ന ഗുണമേന്മയുള്ള പ്രോട്ടീൻ അടങ്ങിയിട്ടുണ്ട്. ശരീരത്തിന് സ്വയം ഉൽപ്പാദിപ്പിക്കാൻ കഴിയാത്ത ഒമ്പത് അത്യാവശ്യ അമിനോ ആസിഡുകളും ഇതിൽ ഉൾപ്പെടുന്നു. പതിവായി മുട്ട കഴിക്കുന്നത് പേശികളുടെ ബലം നിലനിർത്താനും വ്യായാമത്തിന് ശേഷമുള്ള വീണ്ടെടുക്കലിനും സഹായിക്കുന്നു. കൂടാതെ, കൂടുതൽ നേരം വയർ നിറഞ്ഞതായി തോന്നിക്കാൻ സഹായിക്കുന്നതിലൂടെ ശരീരഭാരം നിയന്ത്രിക്കാനും ഇത് ഗുണകരമാണ്.
2. കൊളസ്ട്രോളും ഹൃദയാരോഗ്യവും
മുട്ടയുടെ മഞ്ഞക്കരുവിൽ കൊളസ്ട്രോൾ കൂടുതലാണ്. ഒരു വലിയ മുട്ടയിൽ ഏകദേശം 180-200 മില്ലിഗ്രാം കൊളസ്ട്രോൾ അടങ്ങിയിട്ടുണ്ട്. എന്നാൽ ഭൂരിഭാഗം ആരോഗ്യവാനായ ആളുകളിലും ഇത് രക്തത്തിലെ കൊളസ്ട്രോളിന്റെ അളവിനെ നേരിട്ട് ബാധിക്കുന്നില്ല. ഹാർവാർഡ് സർവ്വകലാശാലയും മറ്റും നടത്തിയ പഠനങ്ങൾ പ്രകാരം, ആരോഗ്യവാനായ ഒരാൾ ഒരു ദിവസം ഒരു മുട്ട വീതം കഴിക്കുന്നത് ഹൃദ്രോഗ സാധ്യത വർധിപ്പിക്കുന്നില്ലെന്ന് കണ്ടെത്തിയിട്ടുണ്ട്. മാത്രമല്ല, ചിലരിൽ ദിവസേന ഒരു മുട്ട കഴിക്കുന്നത് ഹൃദയസംബന്ധമായ അസുഖങ്ങൾ വരാനുള്ള സാധ്യത നേരിയ തോതിൽ കുറയ്ക്കുന്നതായും പഠനങ്ങൾ സൂചിപ്പിക്കുന്നു.
3. തലച്ചോറിന്റെയും കണ്ണിന്റെയും ആരോഗ്യം
തലച്ചോറിന്റെ വികാസം, ഓർമ്മശക്തി, കരളിന്റെ പ്രവർത്തനം എന്നിവയ്ക്ക് അത്യാവശ്യമായ കോളിൻ എന്ന പോഷകത്താൽ സമ്പന്നമാണ് മുട്ട. കോളിൻ കോശഭിത്തികൾ നിർമ്മിക്കാനും നാഡീസന്ദേശങ്ങൾ കൃത്യമായി കൈമാറാനും സഹായിക്കുന്നു. അതുകൊണ്ടാണ് ഗർഭിണികളും പ്രായമായവരും മുട്ട ഭക്ഷണത്തിൽ ഉൾപ്പെടുത്താൻ ഡോക്ടർമാർ നിർദേശിക്കുന്നത്. കൂടാതെ, മുട്ടയുടെ മഞ്ഞക്കരുവിൽ ലൂട്ടീൻ, സീസാന്തിൻ എന്നീ ആന്റിഓക്സിഡന്റുകൾ അടങ്ങിയിട്ടുണ്ട്. ഇവ പ്രായമാകുമ്പോൾ ഉണ്ടാകുന്ന കാഴ്ചശക്തി കുറവിനും തിമിരത്തിനും എതിരെ സംരക്ഷണം നൽകുന്നു.
4. ശരീര ഭാര നിയന്ത്രണവും പഞ്ചസാരയുടെ അളവും
മുട്ടയിൽ ഉയർന്ന അളവിൽ പ്രോട്ടീൻ അടങ്ങിയിട്ടുണ്ട്, എന്നാൽ കാലറി കുറവുമാണ്. ഇത് വയർ നിറഞ്ഞതായി തോന്നിപ്പിക്കുകയും ഇടവേളകളിലെ ലഘുഭക്ഷണങ്ങൾ ഒഴിവാക്കാൻ സഹായിക്കുകയും ചെയ്യുന്നു. പ്രഭാതഭക്ഷണത്തിന് മുട്ട കഴിക്കുന്നവർക്ക് പകൽ മുഴുവൻ സംതൃപ്തി അനുഭവപ്പെടാറുണ്ടെന്നും, പിന്നീട് കഴിക്കുന്ന ഭക്ഷണത്തിന്റെ അളവ് കുറയുമെന്നും പല പഠനങ്ങളും സൂചിപ്പിക്കുന്നു. ഇതിലൂടെ ശരീരഭാരവും രക്തത്തിലെ പഞ്ചസാരയുടെ അളവും നിയന്ത്രിക്കാൻ സാധിക്കും.
ദിവസവും എത്ര മുട്ട കഴിക്കുന്നത് ആരോഗ്യകരമാണ്?
ആരോഗ്യമുള്ള മുതിർന്നവർക്കായുള്ള നിലവിലെ മാർഗനിർദ്ദേശങ്ങൾ അനുസരിച്ച്, ദിവസവും ഒരു മുട്ട വീതം കഴിക്കുന്നത് സുരക്ഷിതവും സമീകൃതാഹാരത്തിന്റെ ഭാഗവുമാണ്. ഹൃദ്രോഗമില്ലാത്തവരും മുട്ട കഴിക്കാൻ ഇഷ്ടപ്പെടുന്നവരും ആണെങ്കിൽ, അവരുടെ ഭക്ഷണക്രമത്തിൽ പൂരിത കൊഴുപ്പ് കുറവാണെങ്കിലും പച്ചക്കറികളും പഴങ്ങളും ധാന്യങ്ങളും ധാരാളമായി ഉൾപ്പെടുന്നുണ്ടെങ്കിലും ദിവസവും രണ്ട് മുട്ട വരെ കഴിക്കാവുന്നതാണ്.
ഉയർന്ന കൊളസ്ട്രോൾ, ഹൃദ്രോഗം, അല്ലെങ്കിൽ ടൈപ്പ് 2 പ്രമേഹം ഉള്ളവർ ആഴ്ചയിൽ മൂന്ന് മുതൽ നാല് വരെ മുട്ടകളായി നിയന്ത്രിക്കാൻ സാധാരണയായി നിർദേശിക്കാറുണ്ട്. വ്യക്തിപരമായ ആരോഗ്യസ്ഥിതിക്ക് അനുസരിച്ചുള്ള ഉപദേശങ്ങൾക്കായി ഒരു ഡോക്ടറുടെയോ ഡയറ്റീഷ്യന്റെയോ സഹായം തേടുക.
