ചെന്നൈ: തമിഴ്നാട്ടിൽ ഡിഗ്രീ സർട്ടിഫിക്കറ്റ് ലഭിക്കാത്തതിനേ തുടർപഠനത്തിന് വഴിയില്ലാതെ നിരവധി വിദ്യാർത്ഥികൾ കുഴയുന്നു. ഉപരിപഠനത്തിനായി വിദേശത്തേക്ക് പോകാൻ കാത്തിരിക്കുന്ന വിദ്യാർത്ഥികൾ അടക്കം സർട്ടിഫിക്കറ്റ് ലഭിക്കാതെ ആശങ്കപ്പെടുകയാണ്. ദേശീയ മാധ്യമമായ എൻഡിടിവിയാണ് ഇത്തരത്തിൽ വാർത്ത റിപ്പോർട്ട് ചെയ്തിരിക്കുന്നത്.
പന്ത്രണ്ട് സംസ്ഥാന സർവകലാശാലകളിൽ നിന്നുള്ള ഒമ്പത് ലക്ഷത്തിലധികം യോഗ്യത നേടിയ ബിരുദധാരികളും ബിരുദാനന്തര ബിരുദധാരികളും ഗവേഷണ വിദ്യാർത്ഥികളുമാണ് സർട്ടിഫിക്കറ്റ് ഇല്ലാതെ കുടുങ്ങിക്കിടക്കുന്നത്.
അതേസമയം, വിഷയത്തിൽ സംസ്ഥാന സർക്കാർ ഗവർണറേയാണ് കുറ്റപ്പെടുത്തുന്നത്. ചാൻസലറായ ഗവർണർ ആർഎൻ രവിയാണ് ഈ കുഴപ്പത്തിന് കാരണമെന്നായിരുന്നു സംസ്ഥാന ഉന്നത വിദ്യാഭ്യാസ മന്ത്രി ഡോ പൊൻമുടി പറഞ്ഞത്.കേന്ദ്രമന്ത്രിമാരെ മാത്രം മുഖ്യാതിഥികളായി ക്ഷണിക്കാൻ ഗവർണർക്ക് താൽപ്പര്യമുണ്ടെന്നും ഇത് വൈസ് ചാൻസലർമാരും മറ്റ് പണ്ഡിതന്മാരും സംസ്ഥാനത്ത് ഉള്ളപ്പോൾ കാലതാമസമുണ്ടാക്കുന്നുവെന്നും അദ്ദേഹം ആരോപിക്കുന്നു.
മലയാളികൾ അടക്കം പഠിക്കുന്ന കോയമ്പത്തൂരിലെ ഭാരതിയാർ യൂണിവേഴ്‌സിറ്റിയിലാണ് പ്രശ്‌നം രൂക്ഷമായിരിക്കുന്നത്. ഒരു വർഷത്തോളമായി ഇവിടെ ഒരു വൈസ് ചാൻസലറില്ല, കൂടാതെ കോൺവൊക്കേഷൻ നടത്താൻ സാധിച്ചിട്ടില്ല.
ഉപാധികളില്ലാത്ത സെർച്ച് കമ്മിറ്റിയിൽ തന്റെ നോമിനി വേണമെന്ന ഗവർണറുടെ കടുംപിടിത്തമാണ് ഇതിന് കാരണമെന്നും, ഗവർണർ നിയമനം വൈകിപ്പിക്കുന്നതെന്നാണ് സംസ്ഥാന സർക്കാരിന്റെ പ്രധാന ആരോപണം.
മറ്റൊരു സർവ്വകലാശാലയിലും ഇത്തരത്തിലുള്ള കാലതാമസം ഉണ്ടായതായി ഞാൻ കരുതുന്നില്ല. അവരുടെ അക്കാദമിക് കലണ്ടറിന്റെ ഭാഗമായാണ് ബിരുദം ഉള്ളതെന്ന് പ്രശസ്ത കരിയർ കൺസൾട്ടന്റായ ജയപ്രകാശ് ഗാന്ധി മാധ്യമത്തോട് പറഞ്ഞു.
കോൺവെക്കേഷൻ ചടങ്ങിൽ എല്ലായ്‌പ്പോഴും ഒരു മുഖ്യാതിഥി ഉണ്ടായിരിക്കണം എന്നില്ല. ചാൻസലർക്കും വൈസ് ചാൻസലർക്കും അത് ചെയ്യാൻ കഴിയും. ഗവർണറും ഉന്നത വിദ്യാഭ്യാസ വകുപ്പും രാഷ്ട്രീയ ഭിന്നത മറന്ന് കൃത്യസമയത്ത് കോൺവൊക്കേഷൻ നടത്തണമെന്നും അദ്ദേഹം കൂട്ടിച്ചേർത്തു.
എന്നിരുന്നാലും, രാജ്ഭവൻ വൃത്തങ്ങൾ അവകാശപ്പെടുന്നത് ഏഴ് സർവകലാശാലകൾ മാത്രമാണ് ബിരുദദാന തീയതികൾ ആവശ്യപ്പെട്ടതെന്നും നാലിന് ഗവർണർ അനുമതി നൽകിയെന്നുമാണ്.
