കേരള ലോക്ഭവനിൽ ഗവർണർക്കും അദ്ദേഹത്തിന്റെ ചില പേഴ്സണൽ സ്റ്റാഫിനും നൽകുന്ന ഭക്ഷണത്തിൽ ഇനി മത്സ്യവും മാംസവും ഒഴിവാക്കുമെന്ന് റിപ്പോർട്ട്. കേരള ഗവർണറായി ചുമതലയേറ്റ ഓം പ്രകാശ് മാഥൂർ ശുദ്ധ സസ്യാഹാരിയായതിനാൽ അദ്ദേഹത്തിനും ചില പേഴ്സണൽ സ്റ്റാഫിനും നൽകുന്ന ഭക്ഷണം പൂർണമായും സസ്യാഹാരമാക്കാനാണ് നിർദേശമെന്നാണ് മീഡിയവൺ റിപ്പോർട്ട് ചെയ്യുന്നത്.
ഗവർണർക്കും ഏതാനും പേഴ്സണൽ സ്റ്റാഫിനുമാണ് ലോക്ഭവൻ അടുക്കളയിൽനിന്ന് ഭക്ഷണം നൽകുന്നത്. മറ്റു ജീവനക്കാർ വീടുകളിൽനിന്ന് ഭക്ഷണം കൊണ്ടുവരികയോ പുറത്തുനിന്ന് കഴിക്കുകയോ ആണ് പതിവ്. ഇവർക്ക് ഭക്ഷണത്തിന്റെ കാര്യത്തിൽ നിയന്ത്രണങ്ങളൊന്നും ഏർപ്പെടുത്തിയിട്ടില്ലെന്നാണ് റിപ്പോർട്ടിൽ പറയുന്നത്.
ലോക്ഭവനിൽ അതിഥികൾക്കായി നടത്തുന്ന വിരുന്നുകളിലും സസ്യാഹാര വിഭവങ്ങളാണ് വിളമ്പാറുള്ളതെന്ന് റിപ്പോർട്ട് വ്യക്തമാക്കുന്നു. മുൻ ഗവർണർമാരായ രാജേന്ദ്ര ആർലേക്കറുടെയും ആരിഫ് മുഹമ്മദ് ഖാന്റെയും കാലത്ത് ലോക്ഭവനിൽ മാംസാഹാര വിഭവങ്ങൾ ഉപയോഗിച്ചിരുന്നുവെന്നും റിപ്പോർട്ടിൽ പരാമർശിക്കുന്നു.
ഗവർണറുടെ വ്യക്തിപരമായ ഭക്ഷണശീലം പരിഗണിച്ചുള്ള ക്രമീകരണമാണോ, അതോ ലോക്ഭവനിലെ അടുക്കളയുടെ പ്രവർത്തനത്തിൽ കൂടുതൽ വ്യാപകമായ മാറ്റമാണോ എന്ന കാര്യത്തിൽ ലഭ്യമായ റിപ്പോർട്ടിൽ വ്യക്തതയില്ല.
